كنت بحلم طول عمرى انى اسافر برة مصر برة البلد اللى محدش من شعبها حابب يعيش فيها
مع انى فى شغلى وصلت لمراكز جميلة قوى بالنسبة لسنى
حاولت كتير وضورت كتير والفكرة لسة فى بالى
السفر
واخيرا جاتنى الفرصة
وبقيت بخلص فى الورق بكل جهدى زى مااكون خارج من النار ونصيبى جة فى السعودية
بلد جميلة قوى بلد محترمة جدا بلد اخلاقية بلد الواحد يعرف يعيش فيها من غير مايرتكب سيئات
دة كان فكرى قبل مااسافر !!!!
ومن اول يوم بخلص فية الورق وانا قمة السعادة والفرحة وشايف لنفسى مستقبل باهر برة مصر
وجة يوم السفر
كان على ما اتذكر يوم اربع
الكل فرحان وبيقولى مبروك الا شخص واحد مش فرحان
أمى
زعلت قوى قوى وكان نفسها انى افضل معاها انما انا فرحان ومستغرب وبقول هى لية مش عايزانى اسافر
بقول مانا هاكلمها وهاتكلمنى يعنى خلاص مفيش مشكلة ولما لقيتنى مصر على قرارى قالتلى ربنا ستر عليك
وابتسمت فى وشى بس ورا الابتسامة دى كانت بحور من الاحزان
